Málefnaskrá 2012.

Röskva vill stuðla að því að sérstöku netfangi fyrir fjarnema verði komið upp sem hagsmunafulltrúi Stúdentaráðs hafi umsjón með. Þar skal vera vettvangur fyrir fjarnema til að koma að spurningum, kvörtunum eða öðrum ábendingum, sem hagsmunafulltrúi aðstoðar þá við að leysa úr. Einnig vill Röskva að hagsmunafulltrúi Stúdentaráðs beiti sér fyrir málefnum fjarnema með auknum hætti.  Röskva vill leggja sérstaka áherslu á að kennarar séu tæknilega undir það búnir að kenna nemendum í fjarnámi alveg frá byrjun annar.

Röskva vill að staðlotur fjarnema séu skipulagðar með hagsmuni nemendanna að leiðarljósi. Oft er kennslustundum sem myndu auðveldlega rúmast á tveimur dögum dreift yfir heila viku, með tilheyrandi kostnaði og óþægindum fyrir fjarnema. Röskva vill að skipulag staðlota í valfögum sé í samræmi við aðrar staðlotur sem skipulagðar eru.

Röskva vill, í samræmi við hugsjón sína um að gera stúdentum kleift að lifa á ódýrari máta, að ferðastyrkur/afsláttur fyrir stúdenta sem stunda fjarnám, eru utan af landi eða stunda nám á Laugarvatni, standi til boða og ferðalán LÍN séu í samræmi við verðlag.

Röskva vill að sem allra flestar kennslustundir séu teknar upp og gerðar aðgengilegar á netinu. Tæknin er til staðar, það þarf bara að virkja hana. Þetta kæmi bæði fjarnemum sem og staðnemum til góða því oft á fólk ekki heimangengt af óviðráðanlegum orsökum.

Ódýrt í strætó fyrir alla stúdenta.

Röskva vill stuðla að lækkun fargjalda í strætó fyrir stúdenta með það að langtímamarkmiði að stúdentar geti nýtt sér almenningssamgöngur að kostnaðarlausu. Röskva vill að hvatt sé til umhverfisvænna samgangna og minnkun bílanotkunar.  Forsenda þess að umhverfisvænni almenningssamgöngur séu fyrsti kostur stúdenta er að þær séu hagstæður og góður fararmáti. Því er mikilvægt er að SHÍ beiti sér fyrir betri og ódýrari þjónustu Strætó.

Grænn Háskóli.

Röskva vill að Háskóli Íslands sé í fararbroddi á öllum sviðum umhverfismála. Háskólinn á að hvetja til umhverfisverndar og umhverfisvænna lifnaðarhátta, til dæmis með auknum afslætti á kaffi í fjölnota máli og að vörur í Hámu séu litamerktar eftir því í hvaða endurvinnslutunnu þær fara. Röskva fagnar nýkominni áherslu Háskóla Íslands á endurvinnslu og vill sjá enn frekari þróun á því sviði. Röskva vill að Háskóli Íslands setji sér það markmið að hljóta viðurkennda, alþjóðlega umhverfisvottun, á borð við Grænfánann.

Röskva vill að möguleiki á rafvæðingu námsgagna sé kannaður innan raða háskólans.

Efling umhverfisvitundar.

Leita þarf nýrra og áhugaverðra leiða til eflingar umhverfisvitundar, sérstaklega meðal nemenda. Efla má umhverfisvitund með því að auka umræðu meðal háskólafólks, t.d. með fyrirlestrum, málþingum, rannsóknarverkefnum, blaðaútgáfum og styrkveitingum.

Röskva vill hærri fæðingarstyrk.
Röskva vill sjá fæðingarstyrk til námsmanna í samræmi við framfærslutöflu LÍN. Eins og fyrirkomulagið er núna fá allir námsmenn sömu upphæð í fæðingarstyrk, óháð hjúpskaparstöðu og fjölda barna. Þetta gerir mörgum foreldrum erfitt að stunda nám á meðan námi stendur.

Röskva vill hærri mótframlög sveitarfélaga til leikskóla.
Mikilvægt er að hlúa að leikskólum, jafnt opinberum sem og þeim sem Félagsstofnun stúdenta rekur. Röskva vill að leikskólar FS fái sömu mótframlög frá sveitarfélögum og opinberir leikskólar. Röskva hafnar því að aukinn kostnaður við leikskóladvöl falli á stúdenta í formi leikskólagjalda. Leikskólar eru einn mikilvægasti hlekkurinn í grunnþjónustu samfélagsins og ber að standa vörð um þá.

Röskva vill tryggja rétt allra stúdenta til fæðingarstyrks. 

Núgildandi lög um fæðingarorlof eru meingölluð varðandi rétt stúdenta. Það er ólíðandi að stúdentar fái greidd tæplega 70% af námslánum sínum í fæðingarstyrk og að í ákveðnum tilvikum fá stúdentar erlendis og nýútskrifaðir stúdentar sáralítið greitt úr fæðingarorlofssjóði. Röskvu finnst mikið jafnréttismál að allir nýbakaðir foreldrar fái fullan rétt til greiðslna úr fæðingarorlofssjóði í samræmi við atvinnuleysisbætur

Röskva vill sjá virka fjölskyldunefnd.

Röskva vill tryggja að foreldrar eigi sér virkan málsvara innan háskólans. Meginhugsjón Röskvu hefur ætíð verið jafnrétti til náms. Það að vera foreldri er fullt starf og því reynist fjölskyldufólki oft erfiðara að sækja tíma og stunda nám. Því er nauðsyn að öflugt starf í þágu þeirra fari fram innan raða Stúdentaráðs.

Röskva vill að tekið sé aukið tillit til foreldra.

•  Röskva hefur lengi barist fyrir því að kennslustundum ljúki áður en leikskólar loki. Það er ótækt að foreldrar þurfi jafnvel að sleppa tímum til þess að sækja börnin sín.

• Röskva vill aukið tillit til fjölskyldufólks annaðhvort með því að afnema með öllu mætingarskyldu eftir lokun leikskóla eða að skylt sé að veita fjölskyldufólki ávallt undanþágu frá slíkri skyldu.

• Röskva vill að á háskólasvæðinu verði sett upp einföld aðstaða fyrir börn sem koma með foreldrum sínum í skólann.

• Röskva vill að kennarar veiti foreldrum forgang þegar kemur að því að velja sér tíma fyrir munnleg próf, verklega tíma, umræðutíma og fleira sem gæti verið eftir lokun leik- og grunnskóla. Auk þessa telur Röskva ólíðandi að kennslustundir, sem og próf yfir önnina, séu haldin um helgar.

Röskva vill áframhaldandi samstarf ESN og Stúdentaráðs.
Röskva vill hlúa að starfi ESN í þágu erlendra nema og styrkja samstarf þess við Stúdentaráð.

Röskva vill auka samstarf Stúdentaráðs og erlendra stúdentasamtaka.

Alþjóðasamstarf stúdentafélaga er gríðarlega mikilvægur þáttur í starfsemi Stúdentaráðs og vill Röskva að ráðið taki virkan þátt í starfi Evrópsku stúdentasamtakanna (ESU), tengslaneti stúdentafélaga í Norður- og Eystrasaltslöndunum (NOM-BOM) sem og annarra alþjóðasamtaka sem ráðið er aðili að. Þá vill Röskva reyna að stuðla að aukinni þátttöku íslenskra fulltrúa í ráðum og nefndum slíkra félaga.

Röskva vill tryggja fulltrúa stúdenta í öllum nefndum er fást við Bologna-ferlið.
Stór hluti stefnumótunar Íslands í menntamálum fer raunverulega fram erlendis, þar sem línurnar eru lagðar með sáttmálum sem evrópskir menntamálaráðherrar samþykkja og innleiða í löndum sínum. Í Bologna-ferlinu er m.a. kveðið á um að fulltrúar stúdenta skuli sitja í öllum nefndum er fást við innleiðingu þess og leggur Röskva áherslu á að því sé fylgt eftir.

Röskva villa auka möguleika á því að hluti náms sé tekinn erlendis
Röskva telur að auðvelda eigi nemendum að taka hluta náms síns erlendis án þess að útskrift frestist. Þrátt fyrir að Ísland sé aðili að samningum um samevrópskt háskólasvæði tíðkast enn í sumum deildum að viðurkenna ekki nám erlendis. Fulltryggja þarf að skiptinám sé metið áður en hafið er nám í öðrum skóla. Til að ná því markmiði þarf að auka tengsl við erlenda háskóla sem má meðal annars efla með skiptinemasamningum. Þá hvetur Röskva HÍ einnig til þess að bjóða upp á fleiri sameiginlega námsmöguleika í erlendum háskólum.

Röskva vill bæta stöðu erlendra nema við Háskóla Íslands.

Erlendir nemar eru stór og sívaxandi nemendahópur við Háskóla Íslands. Fyrir utan þau hagsmunamál sem þeir eiga sameiginleg með íslenskum stúdentum varða ýmis réttindamál þá sérstaklega, s.s. meðferð Útlendingastofnunar á erlendum nemum og veitingu kennitalna og lögheimilis. Röskva telur nauðsynlegt að bæta stöðu erlendra nema við Háskóla Íslands.

Röskva vill bæta aðgengi að upplýsingum um þá þætti sem þarf að hafa í huga við skráningu í námskeið.

Röskva vill að upplýsingar um tungumálakröfur nemenda í námskeiðum séu aðgengilegri. Margir erlendir nemendur lenda í erfiðleikum þegar þeir eiga að fá aðgang að Uglu sökum þess að kennitöluumsókn þeirra hefur ekki gengið í gegn. Röskva vill því að upplýsingar um umsókn kennitölu liggi fyrir og að skiptinemum sé auðveldað það ferli.

Röskva vill að útlendingalögin verði endurskoðuð með tilliti til stúdenta frá löndum utan EES

Röskva vill að útlendingalögunum verði breytt svo þau taki sérstaklega tillit til erlendra námsmanna, sér í lagi þeirra sem koma utan EES svæðisins. Nauðsynlegt er að gera stúdentum, sem hyggja á tímabundið nám hér á landi, kleift að koma til landsins án þess að lenda í flóknu ferli hjá íslenskri stjórnsýslu. Það er kaldhæðnislegt að á sama tíma og Háskóli Íslands reynir að laða að sem flesta erlenda nemendur, geri íslenska ríkið námsmönnum utan EES jafn erfitt fyrir og raun ber vitni.

Röskva vill að erlendir námsmenn fái þá flýtimeðferð sem þeir þarfnast.

Útlendingastofnun hefur lögum samkvæmt þrjá mánuði til að afgreiða landvistarleyfi og gilda engin sérákvæði um námsmenn. Erlendir stúdentar hafa lent í því að fá ekki landvistarleyfi áður en kennsla hefst þrátt fyrir að hafa skilað inn umsókn til Háskólans og Útlendingastofnunar á réttum tíma. Þannig þarf námsmaðurinn að sækja um tilskilin leyfi minnst þremur mánuðum áður en hann hyggst hefja nám en þarf að sjálfsögðu fyrst að bíða eftir svari frá Háskólanum – sem berst um þremur mánuðum áður en skóli hefst. Þarna er augljóslega pottur brotinn. Röskva telur að rétt væri að útlendingastofnun og HÍ vinni saman að sérstökum ráðstöfunum handa erlendum nemum um flýtimeðferð landvistarleyfa.

Röskva vill að reglur um framfærslu erlendra nema verði endurskoðaðar

Námsmenn utan Evrópusambandsríkjanna þurfa að eiga framfærslu sem nemur rétt tæpum 100.000 kr. á mánuði fyrir hvern mánuð dvalarinnar til þess að stunda nám við Háskóla Íslands. Þannig þarf námsmaður sem hyggur á nám við háskólann í eitt skólaár að eiga minnst 900.000 kr. á íslenskri bankabók eða geta sýnt fram á þá framfærslu fyrir komu til landsins, en það reynist flestum námsmönnum þungur róður.  Röskva vill að þessi upphæð verði lækkuð og að reglur verði endurskoðaðar með hagsmuni stúdenta að leiðarljósi.

Röskva vill halda áfram þróun tengiliðaverkefnisins með Alþjóðaskrifstofu

Undanfarin ár hefur Stúdentaráð staðið fyrir tengiliðaverkefni, svokölluðu Buddy-verkefni, í samstarfi við Alþjóðaskrifstofu. Verkefnið gengur út á það að allir skiptinemar við Háskóla Íslands fá íslenskan tengilið og þykir það hafa gefist afar vel. Röskva leggur mikla áherslu á að verkefninu sé haldið áfram og það þróað enn frekar.

Röskva vill enskar þýðingar.

Að mati Röskvu á Stúdentaráð og Háskóli Íslands að láta enskar þýðingar fylgja öllum tilkynningum sem snerta stúdenta.

Röskva vill að Háskólinn marki sér stefnu varðandi próftöku erlendra nemenda. Röskva vill að Háskóli Íslands hafi skýra stefnu um próftöku nema sem hafa annað tungumál en íslensku að móðurmáli. Kanna þarf möguleika á enskri útgáfu prófa jafnhliða íslenskum spurningum, orðalistum, lengri próftíma og orðabókanotkun. Þessi atriði eru nú á reiki á milli deilda og brýnt er að háskólinn setji um þau skýrar reglur.

Röskva vill virkja stúdentafylkingar, nemendafélög og önnur hagsmunafélög til að laða að erlenda nemendur.

Röskva vill að nemendafélög og önnur hagsmunafélög innan HÍ hafi upplýsingar á ensku til þess að laða að erlenda nemendur. Röskva telur að erlendir nemar við HÍ muni í kjölfarið eiga greiðari aðgang að félagslífi skólans.

Einnig telur Röskva mikilvægt að upplýsa erlenda nemendur um réttindi þeirra og hvert þeir geti leitað telji þeir brotið á réttindum sínum.

Að auki vill Röskva að erlendir nemendur hafi greiðari aðgang að upplýsingum um hagsmunastarf innan Háskóla Íslands og þeir séu virkjaðir til þátttöku.

Röskva setur jafnrétti í forgang

Rauður þráður í starfi Röskvu er hugsjónin um jafnrétti allra til náms, óháð kyni, efnahag, uppruna, búsetu, fötlun, stöðu eða aðstæðum að öðru leyti. Röskva vill tryggja að hvergi sé brotið á réttindum stúdenta við Háskóla Íslands, sér í lagi þeirra sem teljast til minnihlutahópa. Þá vill Röskva vinna með og hlúa að hinum ýmsu hagsmunafélögum sem starfa innan háskólans.

Röskva kallar eftir jafnrétti kynjanna

Jafnréttismál snerta stúdenta sem og aðra þjóðfélagshópa beint. Launamunur kynjanna er viðvarandi og ótal hindranir standa í vegi fyrir jöfnum tækifærum karla og kvenna á mörgum sviðum. Staðalímyndir kynjanna gegna þarna lykilhlutverki og vill Röskva að þessum staðalímyndum sé útrýmt. Einnig vill Röskva að misrétti gegn konum sé viðurkennt sem það mannréttindabrot sem það er og að samfélagið viðurkenni jafnan rétt kynjanna til stjórnunarstaða og launa.

Röskva vill að stuðlað sé að jöfnum kynjahlutföllum í nemendahóp allra deilda Háskólans

Í nokkrum deildum Háskólans hallar verulega á annað kynið. Röskva vill að Háskólinn beiti sér fyrir því að þessi skekkja verði jöfnuð með sérstakri kynningu á þeim deildum í öllum framhaldsskólum landsins.

Röskva vill jafnari kynjaskiptingu kennara innan deilda HÍ

Raunin er sú að eftir því sem hærra er farið upp metorðstigann hallar verulega á eitt kynið, þessu vill Röskva breyta.

Röskva vill kynjafræði sem skyldufag í kennaramenntun

Röskva vill beita sér fyrir því að sett verði inn í námskrár Menntavísindasviðs kynjafræði sem skyldugrein. Menntakerfið á stóran þátt í mótun og viðhaldi staðalímynda kynjanna. Kennarar gegna miklu ábyrgðarhlutverki hvað því viðkemur og því er mikilvægt að kennarar framtíðarinnar hafi þekkingu á því sviði.

Röskva vill að samstarf við jafnréttisfulltrúa HÍ verði eflt

Við Háskóla Íslands er starfandi jafnréttisfulltrúi. Mikilvægt er að Stúdentaráð sé í góðu samstarfi við hann og nýti sér þekkingu og færni hans er kemur að jafnréttismálum.

Röskva vill að jafnréttisáætlun Háskóla Íslands verði virt

Jafnréttisáætlun Háskóla Íslands á að tryggja raunverulegt jafnrétti innan skólans. Deildum og stjórnsýslusviðum er ætlað að framfylgja áætluninni en hinsvegar hafa verið vandkvæði á því að henni sé fylgt eftir. Röskva krefst þess að slík vinnubrögð líðist ekki og að jafnréttisáætlunin sé virkjuð innan allra deilda.

Röskva vill að vinnu við jafnréttisáætlun SHÍ verði haldið áfram

Stúdentar eiga að vera í fararbroddi þróunar samfélagsins. Í ljósi þess er mikilvægt að Stúdentaráð sem rödd stúdenta móti sér framsækna stefnu í jafnréttismálum í hinum víðasta skilningi. Vinna hefur verið hafin við gerð jafnréttisáætlunar SHÍ og telur Röskva að nauðsynlegt sé að halda þeirri vinnu áfram.

Röskva vill að nefndir SHÍ séu ekki einkynja

Sú staða hefur komið upp að nefndir Stúdentaráðs séu einkynja. Röskva telur að mikilvægt sé að raddir kynjanna fái að heyrast í öllu starfi Stúdentaráðs og fylkingar taki mið af því í skipan nefnda.

Röskva vill efla starf hagsmunasamtaka innan Háskóla Íslands

Nauðsynlegt er að Stúdentaráð styðji við bakið á hagsmunasamtökum innan HÍ. Aðstöðuleysi er að sliga félögin og telur Röskva að mikilvægt sé að ráða bót á því. Röskva hvetur þar að auki Háskóla Íslands til þess að taka málefnum hagsmunasamtaka af mun meiri alvöru en gert hefur verið.

Röskva vinnur að málefnum hinsegin fólks

Röskva vill að hætt verði að ganga út frá því að allir séu gagnkynhneigðir. Röskva telur að nauðsynlegt sé að auka samstarf við samtök hinsegin fólks í Háskóla Íslands til þess að efla umræðu um málefni þeirra.

Röskva vill upplýstari umræðu um málefni hinsegin fólks

Röskva vill viðurkenna þær hindranir sem trans nemendur HÍ standa frammi fyrir. Röskva telur að m.a. þurfi að eyða þeim forskilningi sem miðast við tvískipt kynjakerfi. Það að notast við slíkt kerfi við gerð rannsókna veldur því að þær líta framhjá málefnum hinsegin fólks sem dregur upp skekkta mynd af samfélaginu. Menntun sem litast af tvískiptu kynjakerfi stuðlar að viðhaldi staðalímynda og fordóma.

Röskva vill bæta hag geðfatlaðra og fólks með geðraskanir

Með opinni og upplýstri umræðu vill Röskva beita sér gegn fordómum gagnvart fólki með geðraskanir jafnt innan háskólans sem utan. Þá vill Röskva einnig bæta þjónustu við aðila með geðraskanir innan háskólans meðal annars með því að bæta reglur skólans er varða geðræna röskun og próftöku.

Röskva vill tryggja að fólk með sértæka námsörðugleika fái aðstoð

Röskva vill standa vörð um aðstoð við fólk með sértæka námsörðugleika meðal annars með því að efla greiningarsjóð þess efnis sem þegar starfar. Sjóðurinn þarf að eiga fastan höfuðstól eigi hann að geta sinnt hlutverki sínu sem skyldi. Þá vill Röskva beita sér fyrir því að fordómum gagnvart stúdentum með sértæka námsörðugleika verði útrýmt með opinni og upplýstri umræðu.

Röskva vill auðvelda aðgengi fatlaðra

Röskva telur aðgengi fatlaðra við Háskóla Íslands óviðunandi. Nám við ákveðnar deildir háskólans er ómögulegt öðrum en fólki með fulla hreyfigetu. Röskva vill benda á að Háskólatorg uppfyllir ekki skilyrði er varðar jafnt aðgengi allra. Röskva vill að aðgengismál í Háskólanum verði að forgangsatriði hjá ráðamönnum Háskólans.

Röskva vill punktaletursmerkingar og leiðarlínur innan allra bygginga Háskóla Íslands

Háskólayfirvöld hafa lofað að merkja stofur og skrifstofur skólans með punktaletri og leiðarlínum. Þetta verk hefur tafist allt of lengi og krefst Röskva þess að úr því verði bætt. Geri háskólinn það ekki telur Röskva að stúdentar verði að taka málin í sínar hendur og hafa umsjón með verkinu sjálfir.

Röskva vill minna á ábyrgð kennara á öllum menntastigum

Röskva vill minna á mikilvægi þess að kennaranemar séu undirbúnir sérstaklega til að takast á við fordóma og einelti. Ennfremur ættu kennarar aldrei að tala niður til ákveðins þjóðfélagshóps eða ýta undir fordóma.

Röskva vill að allar kennslustundir séu aðgengilegar á netinu

Stúdentar hafa ekki alltaf tök á að mæta í kennslustundir. Einnig stunda yfir hundrað stúdentar nám á Laugarvatni og ættu þeir að hafa kost á sama námsframboði og aðrir stúdentar við Háskóla Íslands. Röskva vill beita sér fyrir því að fjarnám verði eflt og sem flestar kennslustundir verði í framtíðinni aðgengilegar á Uglunni.

Röskva vill hvetjandi aðgerðir til að auðvelda innflytjendum að sækja sér háskólamenntun

Röskva vill leita lausna til þess að innflytjendur á Íslandi sæki sér frekar háskólamenntun, t.d. með samstarfi við Menntamálaráðuneytið og framhaldsskólana við undirbúning og kynningu á háskólanámi. Röskva vill einnig að gerð verði úttekt á stöðu innflytjenda í menntakerfinu á Íslandi og því hvernig megi auðvelda aðgang þeirra að skólanum, jafnt háskólasamfélaginu og náminu sem þar er boðið upp á.

Röskva er á móti skólagjöldum

Grundvallarhugsjón Röskvu er jafnrétti allra til náms. Röskva berst af heilum hug gegn skólagjöldum vegna þess að þau skerða jafnrétti til náms og skekkja samkeppnishæfni námsgreina.

Hækkun innritunargjalda felur í sér leynd skólagjöld. Röskva telur að fjárskort skólans skuli ekki leysa með því að leita í vasa stúdenta.

Röskva hafnar fjöldatakmörkunum við Háskóla Íslands

Undanfarið hafa inntökupróf  við Háskólann verið mikið í umræðunni. Röskva hafnar slíkum hugmyndum. Krafa Röskvu er að ríkið standi við skyldur sínar og fari í nauðsynlega endurskipulagningu á menntakerfinu með hagsmuni opinberra háskóla að leiðarljósi svo að jafnrétti til náms verði ekki stefnt í hættu. Það er ólíðandi að ríkið greiði ekki að fullu fyrir alla nemendur sem stunda nám við Háskóla Íslands og krefst Röskva þess að aukið fjármagn verði lagt fram til Háskólans. Aðeins þannig getum við útilokað fjöldatakmarkanir og staðið að fullu vörð um jafnrétti til náms.

Háskólaráð hefur annars vegar rætt um inntökupróf og hins vegar takmörkun sem byggir á framvindukröfu. Af tvennu illu telur Röskva að mun sanngjarnari og minna íþyngjandi leið sem síður myndi ógna jafnrétti allra til háskólanáms væri ákveðin framvindukrafa náms við Háskóla Íslands. Þar fengju stúdentar tækifæri til að standast kröfur deildarinnar, í stað inngangs- og fjöldatakmarkana. Þannig fá allir jafnt tækifæri til að hefja nám

Upptökupróf

Röskva vill að sérstök upptökupróf verði gerð að meginreglu á ný. Slík próf skal halda sem skemmst frá lokum próftímabils en þó þannig að stúdentar hafi nægan tíma til undirbúnings. Það er eðlileg krafa að deildir Háskólans hafi skýra og samræmda stefnu um fyrirkomulag upptökuprófa og að ljóst sé strax frá upphafi misseris hvernig þeim verði háttað.

Fjölbreyttara námsmat innan HÍ

Röskva hvetur Háskóla Íslands til að skoða nýjar leiðir í námsmati. Til að bæta gæði náms við HÍ þarf meðal annars að endurskoða hvernig nám er metið. Röskva leggur til að settur verði af stað starfshópur sem kannar fjölbreyttari námsmatsaðferðir og skoða ætti hvort mögulegt sé að leggja niður próf í vissum áföngum. Litið verði sérstaklega til alþjóðlegra háskóla í fremstu röð sem hafa tekið upp annars konar námsmat. Í þessu samhengi má nefna Harvard sem stefnir hröðum skrefum í þá átt að leggja niður öll lokapróf. Röskva býst við að sá lærdómur sem komi úr þessari vinnu tryggi að Háskóli Íslands sé framsækinn háskóli og samkeppnishæfur á alþjóðagrundvelli.

Röskva vill aukið framboð fjarnáms

Lengi hefur tíðkast að taka upp einstaka fyrirlestra og námsskeið við Háskóla Íslands, bæði hljóðritanir og myndupptökur. Þar sem tæknin er nú þegar til staðar telur Röskva í hæsta máta óeðlilegt að ekki sé notast við hana í auknum mæli til að efla fjarnám við Háskólann. Röskva vill því að þeir fyrirlestrar sem henta til upptöku séu teknir upp og að leitað sé leiða til að auka framboð fjarnáms.

Röskva vill reglur um skil einkunna fyrir ritgerðir, skyndipróf og heimapróf

Engar reglur eru gildandi um einkunnaskil fyrir ritgerðir, skyndipróf og heimapróf.

Miðað við þann árangur sem hefur náðst varðandi einkunnaskil í lokaprófum á að vera hægt að stórbæta þettameð skilvirkum reglum og eftirfylgni.

Röskva vill að skipuð verði fagleg nefnd um sumarannir

Ekki var staðið sem skyldi að þeim sumarönnum sem boðið var upp á við Háskóla Íslands undanfarin ár. Námsframboði var mjög áfátt og endanleg ákvörðun um framkvæmdina var ekki tekin fyrr en nokkrum vikum áður en námið átti að hefjast.

Mikilvægt er að Háskóli Íslands skipi faglega nefnd til að kanna möguleika og leiðir til að koma á sumarönnum við Háskóla Íslands og tryggja þannig að staðið verður betur að þeim í framtíðinni.

Röskva vill meira samstarf stúdenta við stjórnsýslu Háskóla Íslands

Innan allra fræðasviða háskólans ættu að tíðkast reglulegir fundir milli fulltrúa nemenda og forseta fræðasviðs. Með nánara samstarfi og meiri samskiptum stúdenta við stjórnsýslu Háskólans er hægt að auka vægi og áhrif stúdenta í ákvarðanatöku. Röskva vill sjá virka fulltrúa nemenda á öllum deildarfundum innan Háskólans.

Röskva vill kennslunefnd í hverja deild

Röskva krefst þess að stefnu Háskólans í kennslumálum verði framfylgt, en hún gerir m.a. ráð fyrir því að kennslunefndir, með virkri þátttöku stúdenta, verði stofnaðar í hverri deild fyrir sig. Þessar nefndir eiga að hafa það verkefni að bæta kennsluhætti í viðkomandi deild, vinna að námskeiðahaldi fyrir kennara, efla umræðu um gæði kennslu o.fl. Háskólinn þarf að leggja meiri áherslu og fjármagn í kennslumál.

Röskva vill faglegri vinnubrögð við gæðaeftirlit:

Betri eftirfylgni kennslukannana:

Deildarfulltrúar stúdenta eiga rétt á aðgangi að niðurstöðum kennslukannana. Röskva vill tryggja, með skýrum reglum og verkferlum, að niðurstöður kennslukönnunar nýtist til þess að bæta nám við Háskólann.

Markvissari innleiðingu gæðaviðmiða Bologna-ferlisins:

Röskva vill taka virkan þátt í að móta hina samevrópsku menntastefnu, m.a. með skilvirkari innleiðingu Bologna-ferlisins.

Bologna-ferlið miðar að samræmingu náms í Evrópu, þ.e. að gera Evrópu að einu hágæða háskólasvæði. Háskólinn þarf að ganga hraðar og skilvirkar til verks til þess að innleiða ferlið.

Röskva vill skylda alla kennara á námskeið í kennsluháttum

Háskólinn býður upp á námskeið í kennsluháttum og –aðferðum og einnig svokallað Mentor kerfi fyrir nýja kennara. Röskva fagnar þessu en vill að þetta verði gert að skilyrði við upphaf starfa við Háskólann sem og að reyndari kennarar sæki námskeið í kennsluháttum á nokkurra ára fresti. Sömuleiðis ætti það að vera skylda að starfsmenn Kennslumiðstöðvar HÍ sitji tíma hjá öllum kennurum og gefi þeim umsögn og ráðleggingar. Þegar á við gætu hulduheimsóknir verið góður kostur.

Röskva vill samræmt vinnuálag nemenda að baki hverri einingu

Flestir stúdentar vita að sú vinna sem liggur að baki hverri einingu er mismikil, þrátt fyrir að Háskólinn eigi að fara eftir alþjóðlegum stöðlum.

Innleiðing ECTS eininga í Háskólann var gölluð að þessu leyti, þar sem ekki fór fram nægileg endurskoðun á vinnuálagi í hverju námskeiði. Háskólinn á að gera miklar kröfur til stúdenta, en þær verða líka að vera samræmdar. Röskva krefst að farið verði eftir reglum um samræmt vinnuálag.

Röskva krefst þess að allir stúdentar fái nægt upplestrarfrí.

Röskva vill að sett verði í reglur Háskólans að ekki megi halda fyrirlestra fimm dögum fyrir prófatímabil.

Röskva vill að stúdentaíbúðir séu hagkvæmari kostur enn hinn almenni leigumarkaður.

Röskva vill að samræmi sé á milli grunnframfærslu námslána og leiguverðs stúdentaíbúða. Nú er leiguverð tengt við vísitölu neysluverðs sem hefur leitt til þess að leigan hækkar umtalsvert á milli mánaða á meðan aðeins er samið um grunnframfærslu einu sinni á ári. Þetta gerir það að verkum að leiguverð getur hækkað snögglega en grunnframfærslan helst sú sama. Þetta tíðkast hvergi á almennum markaði og hefur leitt til þess að stúdentaíbúðirnar eru ekki lengur samkeppnishæfar við íbúðir á almennum markaði.

Röskva vill að litið sé raunsæjum augum á veruleika stúdenta í dag og leiguverð sé lægra en almennt gerist á markaði. Réttara væri að bein tengsl séu á milli grunnframfærslu námslána og leiguverðs.

Röskva vill undanþágu stúdenta frá tekjutengingu húsaleigubóta

Ekki er gert ráð fyrir öðru sambúðarformi á heimili en að tveir einstaklingar séu hjón, sem framfleyti hvoru öðru. Þótt annar aðilinn sé ekki í fullu námi framfleytir hann ekki endilega hinum. Samkvæmt lögum eiga tekjur allra íbúa á heimili að vera lagðar saman þegar tekjurskerðing einstaklinga er metin. Þetta leiðir til þess að fjöldi stúdenta missir rétt sinn til húsaleigubóta. Röskva vill að stúdentum verði veitt undanþága frá þessu ákvæði. Þannig verði tekið tillit til sérstakrar stöðu stúdenta á leigumarkaði og þeim gert kleift að deila íbúðarhúsnæði án þess að fyrirgera rétti sínum til niðurgreiðslu frá ríkinu.

Röskva vill aukna fjölbreytni í húsnæðiskosti stúdenta

Röskva fagnar byggingu nýrra stúdentagarða og vill stuðla að því að byggðir verði fleiri stúdentagarða að erlendri fyrirmynd, þ.e. herbergi með salernisaðstöðu en sameiginlegu eldhúsi og félagsaðstöðu. Þetta leiðir til lægra leiguverðs og gæti einnig bætt félagslíf á stúdentagörðum. Auk þess vill Röskva að gert sé ráð fyrir félagsaðstöðu við byggingu nýrra stúdentagarða. Að auki þarf að bæta húsnæðiskost erlendra nema.

Grænir garðar er framtíðarsýn sem eru umhverfisvænir stúdentagarðar. Nemendur greiðar lægra leiguverð sem er hvatning til nýtinga vistvænna kosta, til dæmis reiðhjóla í stað bíls með byggingu hjólageymsla í stað bílastæða. Einnig væri mikil áhersla á flokkun sorps.

Röskva vill sanngirni í leiguverði á Laugarvatni

Leiguverð stúdentaíbúða á Laugarvatni er í mörgum tilfellum hið sama og leiguverð stúdentaíbúða FS á höfuðborgarsvæðinu. Þetta er í sláandi ósamræmi við stöðu mála á almennum markaði. Röskva vill að stúdentaíbúðir á Laugarvatni séu í umsjá FS í stað Byggingafélag námsmanna. Það muni stuðla að sanngjarnara leiguverði sem er í samræmi við leiguverð utan höfuðborgarsvæðisins.

Íbúðir fyrir fjarnema

Röskva vill að fjarnemum sé gert kleift að leigja íbúðir í skamman tíma þegar staðlotur fara fram.

Lánasjóður íslenskra námsmanna

Röskva vill að grunnframfærslan verði aldrei lægri en atvinnuleysisbætur. Stúdentar eiga að geta stundað nám án þess að þurfa að vinna samhliða.

Röskva leggur áherslu á að frítekjumark LÍN verði hækkað úr 750.000 kr í að minnsta kosti eina milljón króna. Þetta mun sérstaklega koma námsmönnum með lágar tekjur vel.

Röskva vill að bókalán standi undir bókakaupum og að ferðalán standi undir ferðakostnaði stúdenta.

Röskva vill að lágmarkskrafa fyrir lánshæfi náms sé lækkuð. Í dag er 18 ECTS eininga lágmarkskrafa en lán eru ekki greidd út fyrr en þeim fjölda er náð. Röskva telur 12 ECTS einingar vera raunhæft og gott markmið.

Röskva vill hærri námslán til fjölskyldufólks. Tillit er ekki tekið til raunverulegra útgjalda sem fylgja hverju barni við útreikning námslána fjölskyldufólks. Röskva harmar þetta og kallar eftir breytingum.

Röskva vill að mánaðarlegar greiðslur verði mögulegar fyrir stúdenta eftir fyrsta ár sem hafa sýnt fram á eðlilega námsframvindu, líkt og unnið er að innan stjórnar LÍN.

Röskva vill að stúdentar hafi raunverulegt vald innan stjórnar LÍN.

Framtíðarsýn Röskvu um LÍN

Lánasjóðskerfið er að breytast: Röskva telur raunhæft að koma á í náinni framtíð skandinavísku styrkjakerfi í stað lána.

Lánasjóðskerfið er að breytast. Það er á ábyrgð Stúdentaráðs að breyta því nemendum í hag. Í dag er raunverulegt framlag ríkisins, í formi niðurgreiddra vaxta, allt að 50%. Innan stjórnar LÍN hefur komið til umræðu styrkjakerfi að skandinavískri fyrirmynd í stað lánakerfisins sem er í dag. Stúdentaráð á að vera þrýstiafl innan Lánasjóðsins sem berst fyrir því að komið verði á styrkjakerfi á næstu árum. Röskvu finnst ekki rétt að barátta stúdenta snúist ætíð um aukna skuldsetningu námsmanna, þar sem hún ætti í raun að snúast um aukið framlag ríkisins. Óheilbrigt viðhorf til skulda hefur verið vandamál í íslensku samfélagi og er ekki gott veganesti fyrir ungt fólk. Krafan um styrkjakerfið tengist beint hugsjóninni um jafnrétti til náms, enda er það erfitt fyrir stóran hóp að fara í nám af fjárhagslegum ástæðum. Röskvu finnst mikilvægt að koma í gegn nýjum viðmiðum nú þegar tækfærið er til staðar. Það þótti ekki eðlilegt að stúdentar fengju sinn skerf í góðærinu, við viljum sjá til þess að það verði orðið eðlilegt í næsta góðæri.

 Ódýrara að lifa sem námsmaður.

Eins og tíðkast á Norðurlöndum og víðar telur Röskva eðlilegt að stúdentar séu taldir til láglaunahópa eins og öryrkjar og aldraðir . Stúdentar eiga að fá staðlaðan afslátt af samfélagsþjónustu eins og samgöngum, heilbrigðisþjónustu og leikskólaþjónustu. Röskva vill einnig berjast fyrir afslætti í æskulýðsstarfi sveitarfélaga fyrir börn stúdenta. Sömuleiðis vill Röskva að komið verði á sérstökum húsaleigubótum til námsmanna.

 Skuldsetning stúdenta

Röskva vill beita sér fyrir minni skuldsetningu stúdenta. Það eru hagsmunir stúdenta að skuldsetningu sé haldið í lágmarki og að stúdentar komi ekki stórskuldugir úr námi. Meðal lausna á þessu vandamáli er að veita stúdentum afslátt af opinberri þjónustu og koma á styrkjakerfi á í stað námslána, svo eitthvað sé nefnt.

Lágvöruverslun á háskólasvæðið

Röskva vill fá lágvöruverslun á háskólasvæðið svo nemendur geti nýtt sér hagkvæmari kost til matarinnkaupa.

Röskva er á móti skólagjöldum

Grundvallarhugsjón Röskvu er jafnrétti allra til náms. Röskva berst af heilum hug gegn skólagjöldum vegna þess að þau skerða jafnrétti til náms og skekkja samkeppnishæfni námsgreina.

 Röskva er á móti hækkun skrásetningargjalda

Hækkun innritunargjalda felur í sér leynd skólagjöld. Röskva telur að fjárskort skólans skuli ekki leysa með því að leita í vasa stúdenta. Nýverið samþykkti Alþingi lagafrumvarp sem fól í sér rúmlega 30% hækkun á skrásetningargjaldi fyrri ára. Röskva mótmælir þessu og telur þá þróun stjórnvalda, að leita ítrekað í vasa stúdenta til að fjármagna ríkisrekinn háskóla, ótæka.