Um Röskvu

Röskva er stúdentahreyfing sem tekur virkan þátt í hagsmunabaráttu stúdenta.

Röskva var stofnuð árið 1988 og hefur alla tíð borið hag stúdenta fyrir brjósti. Röskva er samtök félagshyggjufólks innan Háskóla Íslands og grundvallarstefna Röskvu hefur alltaf verið sú sama; jafn réttur til náms.

Röskva á fulltrúa í Stúdentaráði, Háskólaþingi og í Háskólaráði Háskóla Íslands.

Röskva telur að hlutverk stúdentaráðs eigi að vera þrýstiafl, sérstaklega á ríkisstjórnina. Það er vegna þess að hagsmunabarátta stúdenta takmarkast ekki við Háskóla Íslands, heldur teygir hún anga sína út í samfélagið allt. Innan Háskóla Íslands beitir Röskva sér fyrir þeim málefnum sem betur mættu fara.

Þar má helst nefna baráttu gegn ólögmætri hækkun skrásetningargjalda, tryggja stúdentum rétt til atvinnuleysisbóta, auka úrræði í geðheilbrigðismálum, bæta lánasjóðskerfið og að jafnræðis sé gætt í hvívetna innan háskólasamfélagsins.

Saga Röskvu

Röskva var stofnuð þann 12. febrúar 1988 við samruna tveggja stúdentahreyfinga, Félags vinstri manna og Félags umbótasinna. Þórunn Sveinbjarnardóttir, fyrrum þingmaður og umhverfisráðherra, var fyrsti formaður Röskvu.

Röskva átti meirihluta í stúdentaráði árin 1991-2002. Árin 2007-2009 fékk Röskva aftur meirihluta. Eftir átta ár í minnihluta sigraði Röskva svo kosningar til Stúdentaráðs árið 2017 og hlaut þá 18 sæti af 27, og hefur haldið meirihluta síðan þá. Árið 2019 hlaut Röskva meirihluta á öllum fimm fræðasviðum háskólans með 17 fulltrúa af 27. Árið 2020 hlaut Röskva svo 13 sæti af 17, en það var þá stærsti sigur sem Röskva hafði unnið. Í stúdentaráðskosningunum árið 2021 vann Röskva sögulegan yfirburðasigur og hlaut 16 af 17 sæti og er það stærsti sigur Röskvu.


Síðast uppfært 8. apríl 2021