Hvað er Röskva?

Röskva er samtök félagshyggjufólks við Háskóla Íslands, stúdentahreyfing í hagsmunabaráttu. Röskva var stofnuð árið 1988 og síðan þá hefur mikill fjöldi hugsjónafólks starfað innan raða samtakanna.

Grundvallarstefna Röskvu hefur alltaf verið sú sama; jafn réttur allra til náms. Allir eiga að hafa tækifæri til að sækja sér æðri menntun ef þeir óska, en ekki bara sumir. Háskólinn á að vera opinn öllum óháð  efnahag, búsetu eða  fötlun.

Menntastofnun á borð við Háskóla Íslands á að vera sameign allra og mikilvægur hlekkur í menntakerfi þjóðarinnar.

Í ár býður Röskva sig fram til Stúdentaráðs og Háskólaþings. Stúdentaráð einbeitir sér að því að efla Háskólann og bæta umhverfi nemenda í skólanum t.d. með því að krefjast upptökuprófa í öllum deildum, krefjast þess að allar kennslustundir verði aðgengilegar á netinu, krefjast  sorpflokkunar og krefjast aukinna gæða í námi. Þetta eru dæmi um málefni sem Röskva hefur beitt sér fyrir. Stúdentaráð stendur auk þess fyrir  viðburðum á borð við Októberfest og Stúdentadaga.

Stúdentaráð sem þrýstiafl

Hagsmunir stúdenta ættu ekki að takmarkast við veggi skólans. Stúdentaráð á að beita sér út á við ásamt  því að stuðla að uppbyggingu innan veggja Háskólans.

Stúdentaráð á að standa vörð um hagsmuni nemenda á öllum vígstöðvum; gagnvart einstaka kennurum, innan stjórnsýslu Háskólans og gagnvart stjórnvöldum svo eitthvað sé nefnt.

Stúdentar eru hluti af samfélaginu; margar mikilvægustu ákvarðanirnar sem snerta stúdenta eru teknar utan skólans. Röskva vill því að Stúdentaráð sé þrýstiafl, veiti yfirvöldum aðhald og láti í sér heyra þegar réttindi stúdenta eru fótum troðin. Enginn annar stendur vörð um hagsmuni stúdenta en þeir sjálfir.

Hagsmunir námsmanna

Við viljum samfélag þar sem menntun er höfð í hávegum og virðing borin fyrir menntun. Þess vegna er það hlutverk Stúdentaráðs að berjast fyrir hagsmunum þessa hóps sem og að stuðla að samstarfi og samneyti innan hópsins. Við áorkum meira með því vinna saman, í stað sundruð, að góðum málum.

Allir sem starfa með Röskvu eiga það sameiginlegt að finnast gaman að taka þátt og vilja hafa áhrif á umhverfi sitt. Röskva samanstendur af ótrúlega fjölbreyttum hópi fólks úr öllum deildum Háskólans. Að starfa með Röskvu er lærdómsríkt, gefandi og ótrúlega skemmtilegt.

Allir stúdentar við Háskóla Íslands geta orðið félagar í Röskvu. Við bjóðum alla þá sem finna samleið með okkur velkomna.

Röskva vill Stúdentaráð sem þorir að láta heyra í sér. Röskva er rödd stúdenta.